智利硬淨劏「烏圭」

猪拉多纳

08/07/2011
文： 朱楓

被譽為今屆美洲盃第三熱門嘅烏拉圭，首仗表現認真曳，「三叉戟」更加完全冇料到，聽朝喺C組第2場分組賽迎戰智利，真係隨時又倒灶，畢竟智利已接近9個月未輸過，戰績靚到咁，呢場平手盤捧智利應該坐走望贏！（有線61及201周六早上6:15直播）




由於聽朝「烏圭」將迎戰被譽為C組最強嘅智利，據講當局將派出1,200名警察維持治安。為支持烏拉圭，消息指至少有3,000名「烏圭」球迷會睇埋呢場先回國，另有400名住喺當地嘅烏拉圭人會入場睇波。


烏拉圭鋒線死火


不過「烏圭」上場被秘魯逼和1:1，表現真係好曳，全場竟然只得7次射門，當中啱啱一季喺意甲射入26球嘅卡雲尼更加一次射門都冇，科蘭就近門「抄飛機」，睇得出「烏圭」同阿根廷一樣，因為一班球星未抖夠，加上個個都係「大佬」，根本擦唔出火花，賽前烏圭領隊泰巴尼斯亦直言，目前最擔心就係喺對智利時未執好條前鋒線。


兵工廠睇中智利維達爾


同烏拉圭相反，智利首仗表現令人驚喜，喺半場落後1球，最後以2:1反勝墨西哥，當中頂入奠勝球嘅中場維達爾，賽後更盛傳獲阿仙奴、祖雲達斯同AC等多間歐洲大會垂青，相信今場必加多兩錢肉緊證身價。雖然智利中場馬迪亞斯費南迪斯上場受創，今場極大機會缺陣，不過上場頂佢嘅卡路士卡莫拿表現唔錯，影響應該唔大。話晒智利都係上屆世盃16強分子，自上年9月喺熱身賽輸畀烏克蘭後，之後打9場比賽都未輸過，近4次對烏拉圭又保持不敗，今場真係隨時贏埋都唔奇架！


烏拉圭近戰失波多


‧近8場3勝2和3負，當中只得2場成功保持清白。




‧世界排名高智利9位排18。

智利近4次交手不敗

‧已連續9場未輸過，獲得6勝3和。

‧近4次交手不敗，獲1勝3和。