德國日本8強大鬥法

猪拉多纳

09/07/2011
文： Mic少

女子世界盃八強今晚展開，德國女足對日本女足，東道主德國今屆三戰三勝，但實際演出稍嫌欠霸氣，尤其係防線甩漏多存在隱憂，相信會盡量發揮進攻上嘅優勢，以彌補防守缺陷。日本進步神速，中前場球員腳風順，隊長澤穗希喺射手榜獨佔鰲頭，投X首選入球大。（有線64台周日凌晨2時45分直播）




德國首兩場勝仗都係僅贏一粒，直至上仗終於恢復霸氣，以四比二擊敗法國，格寧絲上仗力壓名將佩蓮絲，取得正選即梅開二度，佢揚言會好好把握機會，以入波證明自己嘅實力。相信佩蓮絲亦開始感到壓力，應會加多幾錢肉緊，博取領隊妮特歡心，攞番正選。德國鋒線位置競爭激烈，有份落場一定搏命。


日本叉足電火力猛


日本首兩仗都贏波，兼攻入六球，上仗輸畀英格蘭，好大程度因為已取得出線資格，有所留力之下而敗陣，今仗出真功夫，有力為德國大門帶來威脅。事實上，日本中前場球員都係射得之人，今屆六個入球分別由四位球員射入，中場澤穗希有三球進帳，狀態弗爆，德國守將未必睇得住佢。既然雙方火力皆猛，一於直取入球大。