德國轟爆東瀛少女

猪拉多纳

09/07/2011
文： 朱楓

今晚女子世界盃爆發8強激戰，焦點當然落喺衞冕嘅德國女足硬撼日本女足。德國領隊妮特上場大膽收起球星佩蓮絲，點知成隊波即時生晒，證明佢變法成功，呢場對住有「恐歐症」嘅日本，相信可以睇住嚟食，1.8倍「讓球主勝」要捧！（有線64周日凌晨2:45直播）




力爭三連霸嘅德國喺今屆女子世界盃開局麻麻，首兩場都只能以1球僅勝對手，當中星級前鋒佩蓮絲表現更曳到爆，兩場都踢唔夠60分鐘就被換出。為改善隊波表現，德國領隊妮特竟然喺上場對法國嘅爭首名出線大戰中，收起呢位德國神射手，點知前鋒火力即刻撻着，最後大勝對手4:2，足見妮特嘅膽識同調兵遣將能力。


格寧絲孭飛有料到


雖然德國今場可能繼續有中場比寧嘉缺陣，佩蓮絲照舊被打入冷宮，但上場首度擔正就梅開二度嘅格寧絲就揚言已準備好再次擔正，誓要再爭士哥。




日本今屆頭2場分組賽都贏波，一早確定繼95年後再次殺入8強，不過「東瀛少女」喺最後一場分組賽對英格蘭，演出走晒樣輸0:2，反映佢哋對住歐洲嘅力量型球隊，始終有一段距離。


日本對歐洲波即死


賽前日本前鋒永里優季話有信心擊敗德國，中場安藤梢又話想入球賀自己29歲生日，但睇番往績，日本至今喺世界盃9次對住歐洲球隊只得1和8負，當中更只得1場入過波。而且日本之前3場分組賽，正選陣容竟然無變過，多少反映佢哋瓣數唔多，後備力量亦好薄弱，再睇埋日本近6次對住德國只得1和5負戰績，呢場想爆冷？難啲喎！


德國女足8連勝


‧近8場全勝，有6場贏對手2球或以上。

‧之前5屆世盃，4度殺入4強。

日本女足交手往績輸晒

‧近8場3勝2和3負，只得1場冇失波。

‧近6次交手未嘗1勝，獲1和5負。