洪禮賢講馬：勝利之星中環英雄邦先生朝東飛駒 醒目精英魔幻大師羅馬奔騰明興寶寶

猪拉多纳

　　今個馬季最後一戰，祝福讀者好運來，刮番大筆橫財，暑假嘆世界。喺度亦多謝睇足一季嘅馬友，難得知音，感激萬分。

重心場次　第7場　第三班（85-60分）1600米

　　「勝利之星」上賽前講過初出入Q係好有難度，因佢係近乎唔受控情況下衝上嚟，加程贏到唔意外之餘，鍾意佢上賽直路再冇初出時咁green，睇嚟1場熱身進度即入局。再跑長200米，外地早有經驗，唔使擔心，再W。

　　「龍城動力」1600米係略勉強，同埋，佢嘅跑法喺今場或畀同類型對手相沖，係睇吓降班和10磅威力。「中環英雄」上場衰咩唔使再講，換人並加程，合情合理。

　　「朝東飛駒」1檔或賺晒，跑法亦機動，賽事處境應安心。「邦先生」屢次於二班同程輸近，隔了兩場後（前仗被問話），一降班即跑此程，有圖謀。

第1場　第五班（40-0分）1600米

　　「過關勇將」有冇因塞車拖慢咗上場衝刺，都唔覺會贏得到，但證明到大幅加程先至啱性能。落班跑會有優勢，2檔唔難咬好位，如小將做足本分，至少有三甲。

　　「無敵福星」和「帝皇福星」前仗同程幾乎齊到，隔了1仗回到此程，正路腳。「極速寶寶」五班此程兩W，以季內賽績而言，要揀。「威陽」一旦攪番掂，唔應該係要淘汰嘅馬。

第2場　第四班（60-40分）1200米

　　「明海光輝」近兩仗衰在冇擺前，一喺後，自己忟晒。落班即轉程，如跑法肯改變，班利馬重磅亦有權贏。「神聖駒」初出未夠可入P，係咪對手差都好，以當時水準，跑到入前列已覺叻。賽後加大壓力準備並增程，或持續有進。「心中有勁」純粹冇乜對手，所以揀上手，當然，前仗輸畀路程專家嘅績唔曳。「上海先鋒」近仗之中，只要冇「外遊」或隻馬自己出錯，好少冇獎金收，而此程本來係起家路程，等足一季再跑，耐性咁好，冇理由唔想搏。

第3場　第五班（40-20分）1400米

　　「雄心馬主」和「偉感」，有晒貼欄形勢喺上場都贏唔到，的確失望，今場仲要排晒出便，真係要睇早段攞到咩位。「龍船快」配搭幾陌生，但終於等到肯加程，如12檔早段肯上前，佢均速跑法幾煞食。

　　「放縱」同程入Q或拜當日利放頭所致，未必可一可再。「好小子」上賽第四，但前三名全數係貼欄，得佢全程二叠，反先嗰場二三名唔意外。「成功年代」1場「外遊」敗仗換番賠率，而前仗此程僅輸咋（閘前仲要搞咗一輪），十幾倍抵博。「大衛金剛」檔好路程啱，有P望。

第4場　第四班（60-40分）1600米

　　「進攻足球」及「桂花飄香」，前駒贏在路程經驗，卻連搏未贏；後駒銳開而冇此程證明，可爭而非贏面大。

　　「得力助手」與「中國神農」，不確定可交出幾多成，因前駒排外檔而偶有失準；後駒耐冇跑，上場休出沿途算跟得唔錯，但終歸是Q都未入過之馬，難有信心。「領彩」因走外叠，害到佢上場連P都冇，今仗8檔如何，要睇騎者演繹。

第5場　第四班（60-40分）1800米

　　「正榮」和「奪錶」，一對馬上賽分列二三名，所負卻遠，表現係略比預期曳，今場條件冇明顯好轉，最多爭腳。「善風」排番好位，用埋柏寶，途中控制令人放心，勿介意上場之敗。

　　「喜寶寶」落四班後邊場真真正正咁輸？暫時係咪完全冇能力？未必吧！因分數不斷「質」低，隨時爆得。「高分貝」可能已超額完成，兼且，加程未必會比1600米理想。

第6場　第四班（60-40分）1400米

　　「好食德」加程即贏係預計之內，唔係重磅拖垮，再贏。「海王子」分盡，係靠平穩水準及減5磅嚟爭。

　　「傑出君子」及「森淼獵鷹」，四班冇優勢，只係恃住路程經驗打拼。「豹顯神駒」改跑1400米，會比停留喺短途好。「勝利旋峰」此程真係掹掹緊，要大部分對手出錯至有機會跑入前兩名。

第8場　第三班（80-60分）1200米

　　「皇帝法令」1場比1場跑得好，轉到此程即開齋，帶出加程成效，贏開，冇理由挑剔。「金鎸龍華」初出大勝當時錯晒嘅「勝利之星」，評級要略略減低，不過都要尊重，問題係近期此廐新勝馬少打叠贏啫。

　　「按一按」和「新力飛」，級數差唔多，合理配腳。「仁心仁術」首戰直路賽有兩腳，係去到尾段唔夠韌。硬要再數落去，可能已要考慮田草普通但有超輕磅嘅「田園名駒」。

第9場　第三班（80-60分）1400米

　　「醒目精英」三班一線馬，贏完加磅唔算好多，未失勢，係要擔心體力問題啫。「魔幻大師」地慢、攰咗，定係重磅，令上場跑唔出水準，抱有疑問，由於今場少馬走，11檔亦有權切入自領，博多次。

　　「羅馬奔騰」前中段可能與前駒互動，或齊齊賺慢放形勢。「陽明飛飛」一年冇跑及插班初出，唔係冇難度。「明興寶寶」以初出走規及擺位，應該大敗先啱，可以有殿軍，唔簡單。

第10場　第一班（115-90分）1600米

　　「人人興旺」贏到「勁高手」、「讚惑」冇得跑，明顯升呢，計死數，減番10磅喺今場，比上場更筍。「國寶」未甩P，冇理由唔拖。

　　「摩法神采」及「續領風騷」，俱有前景，而前駒近績則冇咁波動。「沙貝利」近仗之中，以今仗對手較低，大冷在此。「家樂飛」連仗啱晒都係三三四四，分數已有壓力。

第11場　第二班（100-80分）1400米

　　「軍事行動」只要比賽時唔係自亂陣腳，以佢級數，喺二班，重磅一樣夠跑。「如願以償」潛藏會比廐侶「喜惑」為多，當然，準繩度係後駒略勝。

　　「旺當家」此程會比短途叻幾多，冇得預料，只宜作腳。「甜橙」此程可贏「風雲武士」，輕磅喺度夠跑。「永勝多」上賽應可再跑近啲，希望抽秤完，有正面影響。

馬會賽馬節目主持　洪禮賢