門神蘇露森巴剋星

猪拉多纳

10/07/2011


美國首席門將蘇露可稱得上係巴西剋星，原來佢同巴西曾經喺○八年北京奧運女足決賽中交過手，結果美國喺蘇露協助下成功贏得女足金牌。其實「巴美」近四次對賽當中，美國都係由蘇露把守最後一關，而巴西四場比賽都冇入球，強如瑪達都冇晒佢符。




○八年北京奧運女足決賽由美國大戰巴西，比賽戰至七十二分鐘，巴西瑪達喺左路突破兼殺入美國心臟地帶，「森巴波后」喺離門六碼勁射竟被蘇露神奇地撲出。今屆女子世界盃「巴美」又再碰頭，而蘇露當然係美國正選球員。佢賽前表示好有信心阻止巴西取得入球，但要淘汰巴西就要靠其他隊友努力。始終足球係團體運動，只要所有人都付出百分百，美國無懼任何球隊。