AIK翻嗒咸史達斯

猪拉多纳

11/07/2011
文： 麥馬拿仁

今晚兩場瑞典超，其中ＡＩＫ蘇納主場鬥咸史達斯。今輪聯賽賽程同上輪主客互調，上仗ＡＩＫ不擅作客但仍然反勝咸軍，返回本季有近九成勝率嘅主場出擊，信心爆棚。咸軍屬包尾大幡，三連敗失八球曳到震，捧「讓球主勝」！




（周二凌晨1時開賽）




完成半程聯賽，咸史達斯十五戰一勝四和十負僅得七分，已成為降班膽。球會本季用上唔少西班牙兵，但卻完全失敗，一眾「鬥牛國」球員質素極曳，而且又有思鄉病，近日球會主席高蘭祖漢臣已證實，五名西班牙借將肯定唔會再上陣。現時咸軍實力差，士氣曳，今場大有可能四連敗，仲可能輸鑊甘。




ＡＩＫ蘇納上仗雖然先失一球，但仍靠一對塞拉里昂前鋒組合堤迪賓古拉同穆罕默德賓古拉，合共轟入三球反勝，贏得本季第二場作客聯賽。事實上，ＡＩＫ主場成績遠勝作客，本季七戰六勝，腳下敗將包括馬模、希爾星堡、奧雷布洛、哥登堡等勁旅，反映ＡＩＫ主場極惡，咸史達斯攻守冇瓣掂，ＡＩＫ唔只贏一粒。


希爾星堡「讓球和」啱啱好


另一戰希爾星堡主場對佐加頓斯，以波論波當然以主隊秤先，但佐加頓斯目前狀態去到巔峰，球員腳風亦順，希堡要贏亦肯定要經過一番苦戰，主隊「讓球主客和」讓一球，捧「讓球和」。