洪禮賢講馬：浪子回頭金不換

猪拉多纳

　　作為情場浪子（小弟冇資格！），係咪真係浪子回頭金不換？價值有冇咁大？有時都幾疑惑不解。被浪子撇下又唔係特別馨香，佢咪一樣係人1個！最多係求戀期過程中，佢嘅點子比正常男人多啲、激啲、型啲，可能帶來更多喜悅。但愛得深，當感情撕開兩片之時，傷口或深可見骨，值唔值得，睇法大家各不同。

　　之所以，一生冇遇上浪子，未必唔係一件好事，感情生活淡淡然又如何！？唔使面對太多「災後重建」，因一般的離離合合，身心愈合速度會較快。如闖進心扉者係浪子，「災後重建」不容易，要重新建立信心，去相信別個男子，講，已經唔容易，付諸實行，更難！

　　咁，喺馬場有冇浪子回頭？擬人法啊，有啲馬也可如是觀。記得之前做最後一期放眼馬世界節目（七月盃），曾經對嗰匹「未來夢想」有浪子嘅睇法，兩歲喺短途賽戰績誇啦啦（曾經試過被阻都贏十個八個身位），轉3歲就⋯⋯，但又唔係冇藉口去重新接受、愛護佢，事關佢轉歲後走去跑中程，場場撞FRANKEL，普天之下，暫時咩馬遇到，同樣統統趴低，所以，係咪3歲冇進步，真係兩睇。

　　由於佢跑番1200米，真真正正浪子回頭，最終打低「屏息以待」，獨贏13倍，分頭幾好，走去買嚿金又真係得噃！

馬會賽馬節目主持　洪禮賢