烏拉圭唔炒等幾時

猪拉多纳

12/07/2011
文： 樂比堅尼

美洲國家盃明早上演C組最後一輪賽事，烏拉圭對墨西哥。墨西哥今個夏天搞到滿城風雨，先有禁藥事件，再有召妓醜聞，本來出班小將打美洲盃，競爭力已經打折扣，依家仲要唔齊腳，難怪分組賽兩戰兩敗，呢班少爺兵目前信心戰意全失，只望趕收工快啲放假，又點會係矢志出線嘅烏拉圭對手，捧「讓球主勝」！




（有線61及201台周三早上8時45分直播）


雙箭頭火力強橫


去年世界盃殿軍烏拉圭，今次美洲盃強陣應戰，前線由兩大箭頭蘇亞雷斯同科蘭領軍，可惜首兩場分組賽分別打和秘魯同智利，表現唔算突出，但經過兩場熱身，今仗對住兩戰兩敗嘅墨西哥，相信會有更佳發揮，由於烏拉圭啱啱喺當地周日嘅世少盃決賽不敵墨西哥，故烏拉圭領隊泰巴尼斯揚言今仗要報回一箭之仇，戰意唔使懷疑！




事實上，烏拉圭首兩仗踢法保守，尤其係上仗對智利，領先一球後不思進取，導致最終被逼和一比一，吸取教訓後，相信烏拉圭今仗會更主動出擊爭勝，以佢哋嘅攻力同前鋒級數，大勝一場絕不出奇。


兩戰盡墨洩晒氣


墨西哥今次美洲國家盃派小將出戰，而且仲缺少多名主力，目的只係為咗吸收經驗，成績對佢哋嚟講唔重要，其實佢哋整體表現已唔算差，兩場波都係僅輸一球，但後生仔即係後生仔，經驗確實差啲，最終都係守唔住，依家墨西哥連輸兩場，班小將好容易洩氣，對住經驗豐富兼戰意旺盛嘅烏拉圭，受讓幾多都好難搵到着數，相信難逃大敗。