泰巴尼斯精忠報國

猪拉多纳

12/07/2011


烏拉圭領隊泰巴尼斯喺南美地位崇高，而去年因帶領國家隊於世盃取得好成績，更令佢贏得年度最佳南美領隊名銜。實在唔少南美國家隊都曾經搵過泰巴尼斯執教，但全部都畀佢拒絕。原來泰巴尼斯有一個宏願，就係協助祖家贏取大型賽事冠軍，一日未達標，都唔會執教其他國家隊。


教國家隊有使命感


早於1980年就開始執教生涯嘅泰巴尼斯，曾經帶過唔少大球會，包括意甲AC米蘭、阿甲小保加、烏拉圭球隊彭拿路等等。泰巴尼斯坦言國家領隊嘅薪酬比起商業球隊少好多，但能夠為祖家効力，令佢有一份使命感，呢種感覺係金錢唔能夠代替。




現年64歲嘅泰巴尼斯表示，烏拉圭國家隊好可能係佢最後一份領隊合約，所以佢會盡心盡力做好呢份工。