洪禮賢講馬：邊場好賭 各有睇法

猪拉多纳

　　口味呢家嘢，因人而異，就算同1個人，喺唔同階段，都會對相同事件有唔同睇法。

　　以杯中物為例，你喜歡飲啤酒係你嘅事，我就鍾情威士忌啫！兩個人幾老友、幾咁投契，甚至係情侶、夫婦又點！？唔能夠強制他人投你所好。

　　當然啦，如果係兩公婆嘅角色，務須對方做好本身台戲，協調互相制衡嘅局面係必然（但有時勉強又冇幸福，矛盾就係咁嚟）。

　　講開杯中物，威士忌嘛，亦分N咁多品牌、出產地、年份、口感。唔敢喺讀者們面前班門弄斧，純粹sharing，就算同一屋簷下嘅太座，同樣對威士忌各有喜好，二人對牌品要求也不一（唯一共通點係必先要蘇格蘭17年或以上）。

　　將話題帶回賽馬世界，自己嘅睇法，唔好強植於他人腦內。你認為易賭嘅場合，可能我唔係咁睇，因為完全冇頭緒。我覺得呢場可以加注，原來你認為今場一定要忍手，事關十成十爆冷格。

太主觀變成霸道

　　亦因上述原因，洪某喺做節目過程當中，久唔久會吸收到拍檔嘅長處。嘩，如果吓吓一開咪就君臨天下咁嘅腔，完全自我膨脹，人哋講咩唔入耳，淨係得自己嗰套係王道，等於殺大同，滅小異！邊可能有進步空間。有時嘗試細聽別人觀點，或可改進自己對一些事睇法，從而達至更深切、更立體。

馬會賽馬節目主持　洪禮賢