瑞典法國入球騷謝幕

猪拉多纳

16/07/2011
文： Mic少

女子世盃季軍戰，瑞典女足對法國女足，第三名之爭往往食之無味，棄之可惜，但從好一方面睇，雙方可以放下心理包袱，盡情享受踢波樂趣，特別係兩隊攻力強，今屆每場都有波入，更加會趁機盡展悅目進攻足球，當表演賽咁踢，娛己娛人，捧1.68倍嘅入球大啱數。（有線64台周六晚11時30分直播）




瑞典今屆表現備受好評，首四仗全勝，包括分組賽擊敗決賽分子美國，估唔到四強反而輸畀日本，呢支北歐勁旅上仗輸波，好大程度上因為門將蓮度多次犯錯所致，隨時影響佢今場把關信心，如果改由後備門將上陣，亦信唔過，瑞典防線的確存在隱憂。




不過瑞典攻力佳，入波唔成問題，中場達姬絲已累積三個入球，只係比巴西瑪達及日本澤穗希少一球，由於前者已出局，後者要喺決賽入波亦唔易，達姬絲可趁機爭神射手獎，相信隊友亦會幫佢一把，製造更多攻勢。


法國攻擊點多唔怕冇士哥


法國可以打入四強已算有交代，球隊喺賽事初期表現唔錯，但之後開始走樣，尤其防線令人失望，近三仗竟然共失八球，幸好進攻方面仍然不俗，保持每場都有波入，已累積九個入球，仲多過瑞典。值得留意係法國九個入球分別由七位球員射入，進攻點夠多，令對手防不勝防，就算今場贏唔到，亦應該可以破蛋。