瑞法女足季軍戰大解放

猪拉多纳

16/07/2011
文： 牛奶仔

今屆女子世界盃已經接近到尾聲，今晚先由兩支準決賽輸波球隊，瑞典女足同法國女足上演季軍戰，預料兩軍都會喺呢場「雞肋」比賽踢得更放，一於跟往績捧1.68倍入球大。（有線64周六晚11:30直播）


兩隊後防穿晒窿


向來大賽嘅季軍戰，兩支隊伍都唔會太過重視，即使唔係揸流攤，都會踢得比較進取，一定唔會全心死守，因為贏同輸個分別始終不大。瑞典女足上場慘被日本反勝後，士氣已經跌到落谷底，而佢哋輸波嘅主要原因，係門將犯錯加上後防頻頻失誤。睇番瑞典其實已經連續3場有失波，合共失咗5球，但火力總算有保證，平均每場入2球，因此近3場波都開出入球大。佢哋今場有後衞菲絲查刑滿復出，但佢只屬後備人馬，預料今場亦唔會正選披甲。




法國女足喺四強畀「一姐」美國技術性擊倒，佢哋同今場對手瑞典一樣，輸在後防穿晒窿任對手狂攻。法國比瑞典更嚴重，近3場波失咗8球，今場對住攻擊力強勁嘅瑞典亦唔慌失得少。最重要係兩軍近5次交手有4次都開入球大，今次喺季軍戰碰頭當然追得過啦！




大戰前夕，國際足協技術委員會尋晚公布，澳洲女足嘅16歲中場姬蓮科特憑住出色嘅助攻助守演出，獲選為今屆女子世盃最佳年輕球員。


賽制：


女子世盃季軍戰採一場決勝制，賽和需加時作賽，再和則互射12碼分勝負。