吾係波牛：巴拉圭讓唔起委內瑞拉

猪拉多纳

20/07/2011
文： 牛奶仔

聽朝場美洲國家盃準決賽，由上場爆冷贏智利嘅委內瑞拉，面對喺今屆法定時間未贏過波嘅巴拉圭，委內瑞拉愈戰愈勇，今戰仲有得受讓，梗係要1.88倍「讓球客勝」啦！（有線61、64、201、203及中央5台周四早上8:45直播）




今場2支球隊分組賽同屬B組，喺小組對決踢成3:3，實力可謂不相伯仲。事實上，世界排名比對手低37位嘅委內瑞拉，今屆戰績暫為2勝2和，表現予人驚喜，上場技術性擊倒智利更睇到呢班波愈嚟愈上力，即使中場湯馬士連干上仗領紅被逐今場要停賽，但預料空缺會由施查斯代替，對整體影響不大。


分組賽交手踢和3:3


巴拉圭上場同樣爆冷晉級，佢哋同巴西激戰120分鐘後互無紀錄，最終靠互射12碼淘汰對手，雖然士氣大有提升，只不過體力上睇怕已大打折扣。




睇過直播嘅都知，巴拉圭喺今屆美洲盃令人大失所望，踢咗4場比賽都未贏過，仲有兩場食白果，喺小組只能夠屈居喺委內瑞拉之後以最佳第3名出線，戰力絕對不宜被高估，況且今場仲有後衞艾卡拉斯攞完紅牌坐波監，分分鐘畀委內瑞拉偷雞贏埋都唔奇。