富咸炒起十字軍

猪拉多纳

21/07/2011
文： 蘇豪

歐霸盃第2圈外圍賽次回合賽事展開，多場賽事強弱懸殊，唔易出現爆冷賽果。英超大軍富咸主場迎戰北愛爾蘭代表十字軍，富咸首戰作客贏3比1，十字軍屬半職業球隊，客場出戰焗攻衰多幾錢重，隨時大敗收場，「讓球主客和」富咸讓二球，照捧「讓球主勝」！（周五凌晨2時30分開賽）




冧新帥唔會hea踢




富咸視歐霸盃外圍賽為季前熱身賽，雖然心態唔算積極，但由於對手實力弱，唔使點耗力已晉級。富咸首回合作客十字軍一度被對手扳平，尾段發力連入兩球贏三比一，現已勝券在握。不過，守將艾朗曉士提醒隊友唔好輕敵，今場一樣要搏，球會由新帥祖爾領軍，一眾球員要爭位，肯定唔會hea踢。




另一邊廂十字軍去季成為北愛超亞軍，於國內表現突出，不過，北愛聯賽水平根本同英超冇得比，十字軍只屬半職業球隊，上次主場出擊奮力作戰都頂唔住，今次作客於劣勢下被迫搶攻，恐怕會輸得更慘。今場主勝冇肉食，富咸應可順利大勝一場，「讓球主勝」熱都要照捧。


米迪蘭特轟炸新聖徒


同日丹麥球隊米迪蘭特主場對威爾斯代表新聖徒，形勢同富咸嗰場非常接近，米迪蘭特首回合作客贏三比一，今次返主場出擊，相信都勒唔住，有望大數新聖徒，捧大盤！另外，葡超球隊國民隊主場對冰島大軍夏拿佐杜亞，雙方首回合各一言和，國民隊回師主場全力鎖定勝局，要「讓球主勝」。