車仔踢好波拉客喪攻「馬國明」

猪拉多纳

21/07/2011
文： 朱楓

車路士今晚展開亞洲之旅首站賽事，喺吉隆坡作客馬來西亞明星隊。藍戰士今次東征，本來人腳已經超晒班，賽前仲勁做騷冧當地「粉絲」，擺明要同利物浦同阿仙奴爭客，對住唔齊腳嘅「馬國明」，絕對有權大開殺戒，即使讓兩球都捧「讓球客勝」！（now633台及廣東體育周四晚8:45直播）


馬國明星隊唔齊腳


車路士今次嚟亞洲將打4場賽事，除咗今晚對「馬國明」，之後會對泰國明星賽，最後會嚟香港打巴克萊亞洲錦標賽。其實車路士未嚟亞洲之前，踢過2場熱身賽，先後擊敗韋甘比同樸茨茅夫，狀態算係唔錯。




今次車路士遠征亞洲，除咗拉美利斯同大衞雷斯踢美洲盃、中場艾辛重傷冇隨隊外，26人大軍基本上粒粒皆星，就連有輕傷嘅施治同阿歷士洛里高都有隨隊。但最估唔到係車仔今次去到馬來西亞勁親民，邀請咗當地車路士球迷會45名幸運兒入場睇練波同影相，最後仲探訪亞洲足協總部。鬼咩！亞洲近年已成英超球會最大海外市場，朱楓預期車仔今晚必搏盡踢場好波，就算新領隊保亞斯講明半場會作出大輪換亦冇有怕。




馬來西亞明星隊近排先後同阿仙奴及利物浦作賽，但分別大敗0:4同3:6，反映佢哋同英超球隊實力有一大段距離。賽前朱楓搵到好料，就係馬來西亞因殺入世界盃亞洲區第2圈外圍賽，嚟緊周六要先作客新加坡，所以一班國腳已經返國家隊備戰，今晚肯定唔會上陣，實力大打折扣，隨時被炒個「客其他」都唔奇！