洪禮賢講馬：選擇與時間

猪拉多纳

　　你揀人，人揀你，正如名曲《等》，「莫道你在選擇人……」有時鍾意又點，唔係大晒。肯去愛，不論係親人、愛人、朋友，對方唔接受，再澎湃嘅愛湧埋去，都係徒然。此外，除咗講究對方係何許人、接唔接受你之外，timing同樣好重要，合得嚟，都要夾啱嗰刻至可「過電」。

　　揀馬其實都係一樣，選擇及timing，皆要講究，好多時快一步係冇錯，譬如某駒之前已閃閃身輸近，趁佢仲有賠率，不就早跟早着，好過係人都睇到佢再有表現嘅時候，熱到冇晒值博率。但亦衍生成本問題，老早去跟，可能食到頭啖湯，亦可能枉費心機（錢），所以，世界上未必只得對與錯，背後仍有其他嘢，牽住問題條尾巴。

　　以「旺國手」做例子，冇邊場唔識喺後面冚上嚟，直路總有段可人追勁，但咩時候先要捧W？！佢上季一出即勝之後，好多場都係得個「近」字，一路跑跑跑！直至5月中，至交出季內第2W，如果季初勝後再追，一共隔了12場，就算唔會場場買，打個7折，仍要追三五七場。行文至此，幾時揀，仲唔係timing話事。

馬會賽馬節目主持　洪禮賢