洪禮賢講馬：水準低有後遺症？

猪拉多纳

　　昨文講到龜速贏馬例子，多年前由魯賓遜策騎嘅「協和之威」，肯定係經典中經典。而歷史往往係會不斷重演，可能只係人物、地點、時間唔同，形態唔會有咩分別，都係睇完會O嘴囉。

　　好似上季「喜綵」贏馬嗰場，算係幾好教材，甚麼叫做慢鬥慢，擺前走攞晒着數，睇完嗰場之後，反住眼咁深深體會到！

喜綵保持上季「紀錄」

　　其實「喜綵」係上季四班谷草一哩「紀錄保持者」，因為贏馬時間係44匹四班此程頭馬之中最慢，仲係唯一超出1分43秒以外嘅頭馬，單睇呢兩點，已經知道佢當時乜形勢都有晒。

　　咁究竟嗰場慢成點？淨係頭三段，已經比標準時間慢4秒有多，之所以，「喜綵」末段整番段22.68秒，根本喺後面唔可能有馬冚到上嚟，跑第二嘅「再來旺財」，就係由出閘開始，咪一直「捕」喺「喜綵」身後，輕易攞到Q腳。

　　而經此一役後，「喜綵」連跑8場皆冇P，至於「再來旺財」亦唔好得去邊，多跑5場連獎金都冇，同時，喺嗰場跑第三嘅「橫亨」，有多9場畀佢跑，結果得1P，服未。

　　唔通賽事水準低，係有傳染性！？如果係咁，真係要小心咁分清，邊啲馬會被「傳染」。