漢堡搵華倫練靶

猪拉多纳

02/08/2011
文： 樂比堅尼

香港時間周三凌晨上演熱身賽，由德甲漢堡主場對西甲華倫西亞。德甲呢個周末就開鑼，早幾日更踢完德國盃，經過一輪催谷之後，漢堡已上晒力，反觀華倫仲處於調整狀態階段，樂比仔梗係捧漢堡啦！（有線61及64台周三凌晨1時15分直播）




玩季初熱身賽有一個先決條件，就係考慮球季開操同開鑼日期，德甲比西甲早開鑼兩星期，千祈咪睇小呢段時間，因為球員經過暑假一輪休息後，需要時間重拾狀態，統帥亦會喺集訓初期，畀多啲機會後備球員上陣，所以開操日期往往係熱身賽嘅勝負關鍵！




事實上，漢堡除參與多場熱身賽，亦踢咗場正式賽事，就係早幾日嘅德國盃，漢堡作客憑韋斯達文及柏歷嘅入球，以二比一擊敗奧爾登堡，新加盟嘅兩名車路士球員文切尼及托利表現搶鏡，加上南韓新貴孫弘民演出神勇，漢堡今季畀人朝氣勃勃嘅感覺，而華倫放走維辛迪及祖亞昆後，兵源調動冇咁充足。


愛華頓偷不來梅雞


另一場雲達不來梅主場對愛華頓，兩隊都已經踢咗多場賽事，所以狀態唔成問題。不來梅今季冇乜大手買賣，較矚目僅希臘中堅柏柏斯達夫普路斯來投，佢哋剛於德國盃不敵海登咸意外出局，教練舒哈夫承受極大壓力，愛華頓隨時有機可乘！（now 676周三凌晨1時30分直播）