哥倫比亞強勢襲馬里

猪拉多纳

02/08/2011
文： 巨高

世青盃又輪到A及B組上演次輪賽事，其中A組哥倫比亞對非洲球隊馬里，同組法國就鬥南韓。主辦國哥倫比亞頭場輕取法國四比一，演出惹人好感，今場面對實力較次球隊馬里，相信哥倫比亞可以再下一城。




先講A組，哥倫比亞早前喺U20美洲國家盃表現都幾差，但估唔到球隊刻意示人以弱，喺世青盃先至展露真正實力。首場比賽面對U19歐國盃冠軍法國，哥倫比亞完全當對手冇到，最終以四比一輕勝。




基於今屆世青盃喺自家門口舉行，重視程度一定高過其他比賽，哥倫比亞實力現已曝光，今場對馬里又點會收番埋，一於再贏多場提早晉級。


烏拉圭級數勝新西蘭


B組方面，烏拉圭有唔少球員早已去到西班牙或意大利發展，例如隊長普蘭達効力意甲熱拿亞、後衞卡比拉亦已去到馬德里體育會，有一定級數。對手新西蘭大賽經驗不足，佢哋首場能逼和喀麥隆，全因對手擺烏龍所致，相信今場難再有運行。