哥倫比亞有地利唔怕

猪拉多纳

02/08/2011
文： 亨格比利

今屆世青盃展開前，唔少人都睇死哥倫比亞冇作為，偏偏呢支東道主就踢出爭氣波，喺A組首戰即大勝法國4:1，令球迷眼前一亮。佢哋今晚再喺波哥大出擊，可望乘勇砌低馬里，一於捧1.8倍「讓主」。（開賽時間：周三早上9:00）


馬里首戰淨吞兩蛋


有地利真係唔同啲，哥倫比亞班小將實力唔算出眾，但勝在有大班同胞打氣，上仗對法國就坐爆4萬座位，據講由於呢支東道主表現Sharp醒，有球迷組織更加作埋打氣歌兼準備超巨型Banner，準備喺聽朝繼續撐場。哥倫比亞上仗靠梅利爾梅開二度反勝法國，領隊盧辛奴更加喺比賽末段換走呢位烏甸尼斯小將同波圖新星占士洛迪古斯，擺明錫住一對前線孖寶，留力聽朝再搏過。




對家馬里首戰淨吞南韓兩蛋，賽後有球員賴天雨整濕場地影響發揮，但查實以干拿迪為首嘅鋒線都唔知浪費咗幾多「餐士」，把握力差到嚇死人。最弊係右閘馬利上仗因膝傷退下火線，防線少咁件猛將對住士氣如虹嘅哥倫比亞聽炒！