流浪防線執位難贏馬模

猪拉多纳

03/08/2011
文： 朱楓

喺歐聯第3圈外圍賽首回合主場輸波嘅格拉斯哥流浪，今晚次回合作客馬模睇怕都係九死一生！事關佢哋首回合輸0:1不特止，仲有後防大將華亞傷出，加上近55年歐洲賽從未試過收復首回合輸波失地，朱楓認為馬模今場至少可以保持不敗，開出1.52倍「讓球主勝」！（開賽時間：周四凌晨1:00）




首回合馬模作客格拉斯哥流浪，本來預計冇得打，點知卻反客為主，控制晒中場，搞到流浪被迫靠兩翼進攻，如果唔係前鋒頻頻失機，馬模最後肯定唔止贏1:0。賽後入波功臣丹尼爾拿臣大讚防守同戰術都無懈可擊，仲有信心可以淘汰流浪出線附加賽。


馬模聯賽踢唔成有得抖


事實上，馬模暫時喺瑞超排中游，後上爭標機會好微，依家肯定將全副心機擺喺歐聯之上，更何況上周六對佐加頓斯場瑞超，球賽初段就有球迷將煙花扔入球場而被迫腰斬，有可能被判輸波，但一班球員就無端端額外獲得休息機會，絕對有利今場發揮。




流浪剛戰蘇超作客贏聖莊士東2:0，新帥麥哥斯取得坐正後首場勝利，可惜新簽後防尼古拉哥恩趕唔切註冊，防線又要變陣，轉過頭斟登地聯前鋒葛維尼又畀布力般流浪截胡，更大鑊係流浪近55年响歐洲賽，從未試過喺首回合主場輸波之後，喺次回合作客可以反勝對手出線，想打破宿命絕對唔易！