精英隊唔赦飛燕諾

猪拉多纳

05/08/2011
文： 笛子波童

朗奴高文執教嘅飛燕諾今晚會於揭幕戰作客鬥精英隊，飛燕諾去季三大主力先後離隊，球隊目前仍在重組階段，精英隊雖然係飛燕諾衞星球會，不過對上兩次聯賽主場都能擊敗對手，精英隊受讓捧「讓球主勝」。（周六凌晨2時開賽）




朗奴高文今季重返荷甲任務其實好艱巨，事關飛燕諾近年因為財困問題不斷賣走主力，要在一時三刻重建球隊真係唔容易，好似上季合共射入二十九個聯賽入球嘅卡斯泰亞奴斯及韋拿杜姆已離隊，上季中以借用形式加盟、迅速成為中場大腦嘅日本小將宮市亮亦已重返阿仙奴，前場失去三名重心，想撕破對手密集防線有難度。


衞星球會唔放水


精英隊屬於飛燕諾衞星球會，大部分資源及主力都係來自飛燕諾，不過咁樣唔代表佢哋對住「大佬」會放水。睇番往績，精英隊對上兩次於聯賽主場面對飛燕諾都能贏波，就算單計作客，三場敗仗都係僅輸○比一，輸波冇輸尊嚴。精英隊上季首場主場聯賽正正就係擊敗飛燕諾，之後三場聯賽乘勇取得兩勝一和，相信今次亦唔會放軟手腳，「讓球主客和」飛燕諾讓一球，撐主隊可保不敗開「讓球主勝」。