英冠開戰侯城填平黑池

猪拉多纳

05/08/2011
文： 朱楓

新一季英冠今晚殺到埋身，打頭陣會由侯城主場對黑池。侯城今季增兵後實力大增，季前熱身賽勁到爆燈，反觀黑池喺查理阿當離隊後，執埋唔少老將，實力冇勁到，相反仲拖慢進攻速度，咁嘅情況，朱楓梗係捧2.05倍主W啦！（now638台及廣東體育周六凌晨2:45直播）




上季僅排11嘅侯城，今季銳意爭升班，季前狂掃貨，借入利物浦門將古拉施斯，又簽埋森林中場麥堅拿同李斯特城後防賀比斯等實而不華球員，結果表現極之對辦，季前熱身賽錄得5戰全勝，當中主場更大勝強陣嘅利物浦3:0，絕對唔講得笑。難怪「老虎」近日夠膽死將早前搞事嘅中場布拿特掟入雪櫃，兼進行內部調查，又將左翼基爾賓尼借畀打比郡。賽前侯城官方網仲話早前喺熱身賽受傷嘅射手積森遜，啱啱喺周三復操，今晚好大機會可以披甲，名副其實如虎添翼。


黑池射手甘保傳走人


黑池上季憑娛樂性踢法成為英超一路奇兵，雖然最後降班收場，但贏盡掌聲，可惜季尾始終留唔住進攻核心查理阿當，無奈只好羅致老牌前鋒菲臘斯同中場巴利費格遜穩定軍心，衰在效果麻麻，喺季後賽只得1勝1和2負，最慘係射手杜迪利甘保仲盛傳會喺日內轉會昆士柏流浪，睇怕黑池今晚九死一生！