阿甲大兜亂 沙士菲不變應萬變

猪拉多纳

05/08/2011


變好？定係唔變好呢？以今日開鑼嘅2011至12年度阿根廷甲組春季聯賽嚟講，以不變應萬變嘅上季冠軍沙士菲，比起變到七彩嘅小保加、學生隊，更加畀到人信心。




變，一直係阿根廷球圈，尤其球迷嘅最大心願。阿甲制度出名騎呢，根本冇辦法同歐美接軌，降班計分方法更係公認嘅笑料。但係冇計吖，阿根廷足總仲係主席格隆多納話事，上季尾唔少人提出嘅改革建議，終於响一個星期前玩完，由於足總會員入面投贊成票嘅唔夠80%，結果又維持一切不變，格隆多納家族真係可以隻手遮天。


阿甲改革胎死腹中


改革胎死腹中，阿甲只有維持現狀，不過唔變未必係壞事，呢句話主要係講球隊陣容方面。今季河床降咗班，所有人嘅焦點集中晒响小保加、沙士菲、學生隊上面。比較起嚟，上季盟主沙士菲以不變應萬變，踢走咗麥斯摩拉利斯、列卡度艾華利斯兩個，就簽番華沙軍團個卡保爾同紐維爾舊生嘅李安度韋拿基斯，人腳變化幾乎等於零，全無默契問題，當然係爭霸熱門之選。


小保加簽9人放7件


相反，另一熱門小保加就新簽同回收9個球員，包括紐維爾舊生個後衞舒希艾維、阿積士嘅施維坦歷治、羅連安特個法蘭高蘇沙等等，同時連埋收山嘅巴拉莫放走咗7件，又嚟一次大執位，真係想夾得好都難。至弊係佢哋繼續踢4-3-1-2陣式，進攻好睇列基美表現好壞，但呢件玻璃腳經常唔Work要抖抖，到時就好睇由獨立隊回巢嘅格拉斯安頂檔掂唔掂嘞。


學生隊華朗做part time


學生隊亦唔好得幾多，羅致8個就趕走9件，一樣動過大手術，而且比較抵死嘅係，佢哋個精神領袖華朗到依家都未簽約，只係兼職形式幫隊波打工，真係唔知佢諗乜。雖則學生隊會長菲力柏斯口口聲聲話唔使驚，承認唔等錢使嘅華朗聽日亦未必會動筆，聯賽都開咯都唔肯簽？學生隊季初唔慌有好表現。