世仇雙錫爭升班

猪拉多纳

05/08/2011


「鋼鐵之城打吡」打到落英甲！新一季英甲本周六開鑼，隨住錫菲聯上季慘烈降班，來季將會同錫周三喺英甲聚首，延續兩支謝菲爾德市球會超過100年嘅鬥爭。錫周三今季喺「雙M」文達歷（Mandaric）同加利麥臣（Megson）帶領下野心勃勃，唔單止要做「鋼城一哥」，目標更係直指升班！




有別於上季賽事，白禮頓有普耶做領隊晨早帶頭，攞冠軍可係意料中事，不過新季英甲暫時睇唔出有邊隊可以帶出，爭標形勢都幾混亂，齋睇實力嘅話，由菲臘布朗領軍嘅普雷斯頓同上季「三哥」哈特斯菲爾德都係升班熱門，不過講到最有話題性，肯定非謝菲爾德市雙雄莫屬！


錫周三新班主大水喉射住


從19世紀起，謝菲爾德市就以鋼鐵工業聞名於世，所以錫菲聯同錫周三嘅同市大戰，長久而來就有「鋼鐵之城打吡（Steel City Derby）」呢個名堂。落到英甲，門票收益同轉播費都大不如前，錫菲聯雖然同錫周三係世仇，但為錢依然要低頭，兩支死對頭創會以來竟然首次共同以福士汽車同Westifield Health做主客波衫嘅心口贊助商，屆時喺聯賽碰頭，場面夠晒過癮。


錫菲聯降班死氣沉沉


錫周三上季雖然以第15名衝線，但季尾獲前樸茨茅夫老闆文達歷接手後，佢即刻清還球會所有負債，仲承諾科水畀曾經執教保頓嘅領隊加利麥臣增兵，挑戰英甲冠軍寶座。因一頭長髮同滿面鬍鬚被稱為「耶穌」嘅中場佩頓，同葡萄牙防中施美度呢個攻守組合一拍即合，加上擁有英超比賽經驗嘅奧森莫保同摩利臣，錫周三要爭升班唔係天方夜譚。




至於佢哋嘅宿敵錫菲聯，去年無論布力維爾、史必抑或米奇阿當斯都冇能力拯救球隊，威爾斯前鋒卓雲伊雲斯季前仲要涉嫌強姦，錫菲聯可謂死氣沉沉。近年錫菲聯喺英冠也文也武，但隨住主力基斯摩根同加斯威爾年事已高，佢哋今季隨時畀錫周三食住，想重返英冠要睇死對頭面色。


普雷斯頓


上季排名：冠22

上季成績：10勝12和24負入54球失79球

孭飛球星：侯姆、美羅

簡　　評：領隊菲臘布朗自年頭上任後已深得球員愛戴，加上前中後三線人腳都屬英冠級數，直接升班係最低要求。

鍚菲聯

上季排名：冠23

上季成績：11勝9和26負入44球失79球

孭飛球星：基斯摩根、尼基蒙哥馬利

簡　　評：上季無論係史必抑或米奇阿當斯都教到錫菲聯死氣沉沉，考慮到球隊保留咗大部分主力，新帥丹尼威爾遜照計可率領球隊殺入升班附加賽。

斯肯索普

上季排名：冠24

上季成績：12勝6和28負入43球失87球

孭飛球星：米高尼爾遜、米高奧干拿

簡　　評：至今仲未為上季離隊嘅射手加利賀柏同希耶斯搵到替補人選，球會財政又有限，即刻重返英冠機會渺茫。

哈特斯菲爾德

上季排名：3

上季成績：25勝12和9負入77球失48球

孭飛球星：達米恩莊臣、魯迪斯

簡　　評：領隊李爾奇勒季前積極增兵，又再借入中場大將達米恩莊臣，人腳超班，目標當然係直接升班英冠。

米爾頓凱恩斯

上季排名：5

上季成績：23勝8和15負入67球失60球

孭飛球星：森巴鐸克、杜姆比

簡　　評：全英格蘭聯賽最後生領隊卡爾羅賓遜，新季繼續由青年軍提拔小將，加上佢嘅大膽進攻戰術，米爾頓凱恩斯依然係英甲最具欣賞價值球隊。

般尼茅夫

上季排名：6

上季成績：19勝14和13負入75球失54球

孭飛球星：佩尤、路維爾

簡　　評：上季同英冠擦身而過，今夏仲要有守將積遜皮雅斯被撬走，而且防線脆弱問題未解決，新季想殺入前6好難。

奧連特

上季排名：7

上季成績：19勝13和14負入71球失62球

孭飛球星：甸尼確斯、占美鍾斯

簡　　評：上季曾經喺足總盃逼和阿仙奴，門將占美鍾斯、翼鋒甸尼確斯同領隊史拉迪都備受垂青，留唔留得住上述3人係奧連特爭升班關鍵。

埃克塞特

上季排名：8

上季成績：20勝10和16負入66球失73球

孭飛球星：拿迪路、保亞沙

簡　　評：英格蘭聯賽平均年齡最細球隊之一，季前有「罰球王」賴恩夏利同首席射手古爾頓離隊，戰鬥力同經驗都嚴重不足。

羅奇代爾

上季排名：9

上季成績：18勝14和14負入63球失55球

孭飛球星：基美斯、加利鍾斯

簡　　評：前曼城青年軍教頭艾里靠佢嘅人脈，簽入前鋒基美斯同後衞托特文等猛將，今季有望挑戰升班附加賽席位。

高車士打

上季排名：10

上季成績：16勝14和16負入57球失63球

孭飛球星：基利士比、基米艾錫

簡　　評：孤寒老闆高寧唔肯科水買前鋒，搞到陣中只係得番基利士比同奧迪查耶兩位射手，爭入前10路艱難。

賓福特

上季排名：11

上季成績：17勝10和19負入55球失62球

孭飛球星：查理麥當奴、約拿芬杜格拉斯

簡　　評：新帥洛士拿季前喺熱身賽攞到唔錯嘅成績，新加盟嘅當奴臣又係英乙神射手，奇兵賓福特隨時喺新季帶畀大家驚喜。

卡素爾

上季排名：12

上季成績：16勝11和19負入60球失62球

孭飛球星：米查歷克、居倫

簡　　評：會方今夏簽入安迪華殊同麥哥雲兩名經驗豐富戰將，力求改善表現「海鮮」嘅老毛病，食粥食飯靠晒一對前鋒居倫同柏德列馬頓。

查爾頓

上季排名：13

上季成績：15勝14和17負入62球失66球

孭飛球星：莊尼積遜、巴利胡禮菲臘斯

簡　　評：隨着上季球會易手，再搵嚟名將基斯包維掌舵，加上會方斥巨資搞青訓，查爾頓嘅革命時代正式展開。

伊奧維

上季排名：14

上季成績：16勝11和19負入56球失66球

孭飛球星：禾頓、比利薩特

簡　　評：鑑於財力問題，今季都只係靠借球員補充實力，最過癮係會方透過Twitter從Fans口中得知阿加特好波，於是免費簽入呢位愛華頓射手。

鍚周三

上季排名：15

上季成績：16勝10和20負入67球失67球

孭飛球星：摩利臣、佩頓

簡　　評：老闆文達歷有錢有野心，領隊加利麥臣有經驗，加上新兵好似佩頓同施美度季前熱身賽表現對辦，錫周三前景非常樂觀。

哈特普爾

上季排名：16

上季成績：15勝12和19負入47球失65球

孭飛球星：列治堪富利斯、蘇蘭奴

簡　　評：季票大減價至最平50鎊一套，令銷量大增，主場人氣唔會曳，不過領隊華斯禾夫仲未解決鋒力薄弱問題。

奧咸

上季排名：17

上季成績：13勝17和16負入53球失60球

孭飛球星：保羅謝拉特、基斯泰萊

簡　　評：繼續留喺全英格蘭聯賽唯一一個3面看台球場，門票收益同資金唔多之下，領隊迪高夫惟有限米煮限飯。

燦美爾

上季排名：18

上季成績：15勝11和20負入53球失60球

孭飛球星：安迪羅賓遜、葛迪遜

簡　　評：季前有守將艾朗加斯威爾同前鋒達爾真寧斯兩大新星被挖走，兵源薄弱新季睇怕都要喺降班邊緣徘徊。

諾士郡

上季排名：19

上季成績：14勝8和24負入46球失60球

孭飛球星：李爾曉士、比路比索

簡　　評：季前熱身賽表現唔錯，新季食粥食飯繼續靠晒「監躉」射手李爾曉士，如果能夠減少失波，有望中游衝線已經達標。

華素爾

上季排名：20

上季成績：12勝12和22負入56球失75球

孭飛球星：阿當張伯斯、麥根

簡　　評：上季煞科日先成功護級嘅華素爾，季前簽入沙特拿同阿當張伯斯等高質球員，來季要以中游排名衝線唔難。

車士打菲特

上季排名：乙1

上季成績：24勝14和8負入85球失51球

孭飛球星：利斯達、韋迪卡

簡　　評：上季移師新球場即錄得破紀錄嘅季票銷售額同雙倍入場人數，不過隨住奇治戴維斯同史摩利一對箭頭離隊，鋒力勢必大大受損。

貝利

上季排名：乙2

上季成績：23勝12和11負入82球失50球

孭飛球星：比斯索普、蘇迪治

簡　　評：今季以護級為大前提，當中「病壞」比斯索普表現好壞直接影響球隊表現，同死對頭羅奇代爾嘅打吡將備受矚目。

韋甘比

上季排名：乙3

上季成績：22勝14和10負入69球失50球

孭飛球星：艾斯禾夫、布隆菲特

簡　　評：未開咧韋甘比就因為興建體育村負債600萬鎊，領隊華杜克想簽好嘢？諗吓好喇！繼續靠地莊搏殺啦！

史提芬納治

上季排名：乙6

上季成績：18勝15和13負入62球失45球

孭飛球星：奇治列特

簡　　評：無論人腳同大軍經驗都冇得同列強比，但史提芬納治自1988年來未試過降班，全隊上下當然希望呢個走勢延續。