國米AC鳥巢大匯演

猪拉多纳

06/08/2011
文： 巨高

中國經濟不斷增長，吸引到唔少歐洲著名球隊趁暑期東來掘金。而今晚一對意甲著名球隊，ＡＣ米蘭以及國際米蘭將於北京鳥巢上演史上最豪華嘅意大利超級盃，兩軍球員總身價接近５億歐元（約55億港元），數字屬歷屆以來之冠，巨高相信兩軍遠道而來必踢身價波，捧大盤。（now 633周六晚８時直播）




意超盃之前曾四度在海外舉行，包括○九年北京、○三與九三年美國及○二年利比亞，但仍然以今次球員身價總額最高，難怪被內地媒體譽為今夏最給力嘅海外ＰＫ大戰。來自意大利超昂貴名牌陣容，配以中國最富特色嘅運動場館，一場夢幻般嘅米蘭打吡今晚爆發。




內地球迷鍾情於意甲，喜好與港澳兩地球迷以英超為主有好大分別。故此意大利足總答應邀請，第二度將意大利超級盃移師中國舉行，希望進一步拓展十三億人口市場。其實好多外地大Brand都想到內地投資或發展，但礙於法制嚴謹令外資無從入手，依家米蘭雙雄竟受內地主辦單位邀請，有少少商業sense都會吐飯應。


近三屆入球騷


要留意近年意大利負債情況嚴重，意大利總理兼ＡＣ米蘭老闆貝魯斯干尼，亦因忙於改善經濟而未能抽空訪華。須知米蘭球隊營運資金極高，根本唔可以再單一地倚賴本土市場，有必要四處開源以令球隊能保持正常運作。可以講今場意超盃已超越一般體育競技範疇，比賽已提升至經濟層面。




當然啦！身為球迷嘅你同我，點都要加添多少投X成分，咁先可以令呢場米蘭打吡睇得更過癮更有味道，而巨高就推介大盤畀大家。而近三屆意超盃都踢得幾開放，總入球都有三個或以上。況且國際米蘭新帥加斯柏連尼主張進攻足球，今晚有望與同市宿敵ＡＣ米蘭合演入球騷。


近五屆意超盃成績


年度 戰果

10 國米3:1羅馬

09 拉素2:1國米

08 國米2:2羅馬（國米12碼勝6:5）

07 羅馬1:0國米

06 國米3:3羅馬（國米加時勝4:3）