紅鑽新星鑿沉勝利船

猪拉多纳

06/08/2011
文： 走肖

難得有機會入選國家隊，梗係要搏啦。浦和紅鑽今晚喺日職主場對神戶勝利船，賽前難得有前鋒柏木陽介、中場山田直輝同翼鋒原口元氣入選集訓名單，踢落肯定更加有信心同動力，相反勝利船輸到入晒水，呢場熱捧紅鑽主W穩陣。（now633及660台周六晚6:00直播）


勝利船近10場輸7場


開季前紅鑽有中場靈魂邦迪離隊，首席射手艾美臣最近被踢走埋，點解咁大膽？因為陣中有大把優質新星囉，好似柏木陽介、山田直輝同原口元氣就分別得23歲、21歲同20歲，上季山田直輝長期養傷，最近好番復出，即使唔係每場踢足，依然成功帶旺紅鑽，連盃賽近5場有4勝1和，雖然集訓完後，紅鑽得柏木陽介入選對南韓嘅熱身賽大軍名單，但原口元氣同山田直輝為咗真正入選，相信會踢得更搏命。




勝利船就閉翳咯，原本嘅隊長宮本恒靖今季入雪櫃，開季至今只係試過兩次喺完場前入替，話晒佢曾經係日本國家隊隊長，教練和田昌裕咁對佢，隊波想士氣好都難。




更何況勝利船王牌大久保嘉人近排有啲傷，連續3場聯賽只能夠後備上陣，和田昌裕把口話錫住佢，實質係唔想畀佢打正選，睇得出佢同陣中大牌球員夾唔埋，而且勝利船連盃賽在內10場波得2勝1和7負，入晒水咁款隨時捲入降班漩渦。