洪禮賢講馬:冒險精神和彩數

猪拉多纳

　　如果對1個人有期望，可能喺未接觸之前，會有好多好多幻想。經過進一步了解後又會點，事與願違？或是加添良好印象，真係唔知道。所以，踏唔踏出第一步，視乎個人勇氣、冒險精神及彩數。

　　買馬亦都係一樣，幾倍W嘅馬，幾十倍嘅馬，個人一樣有膽去試，而事前冇理由預咗會輸，如果咁都去買，真係太想惠澤社群。而肯冒險唔代表一定得，場場有99倍冷W，夠膽買就會贏，咪天真啦。

　　至於對1匹馬有期望，場場追追追，由季初至季尾不斷「幻想」，幾時都唔肯「落車」，上演一齣天荒愛未老馬場版嗎？留待何日終結，又係視乎彩數！

　　而上季曾經對1匹大冷門有期望，就係已經轉咗去東廐嘅「超綵」。喺季尾之前一役（總場次713），初戴面箍表現明顯改善，除咗識得追吓馬，亦令馬頭唔再似得之前兩邊擺。就係咁，翌仗加程至1600米，一於博冷，可惜落場跑無端端跟到鬼咁前，大敗返嚟。但個人並無因為呢場敗仗，對佢嘅期望改變，仲因為轉倉後，反添幻想空間，至於有冇錯，三兩個月內好快就知。

洪禮賢