曼城高薪閒人成籮 打工魔王鬥踢好波

猪拉多纳

07/08/2011


今晚溫布萊爆發嘅社區盾曼市打吡固然激烈，但球場外嘅曼市打工皇帝大激鬥亦同樣精彩。曼城啱啱簽入阿古路搶咗耶耶托尼嘅曼城第一高薪寶座。不過原來呢支富豪兵團專養閒人，5大高薪族竟然有3個今晚冇份踢。反而曼聯呢邊鬥高薪變成良性競爭，朴智星愈踢愈醒，有望踢入埋紅魔人工榜三甲，真係唔講得笑。




朗尼只係袋緊797萬鎊（約1.02億港元）年薪（見附表），擺過曼城計都只排第3，但要知道紅魔對球隊薪金架構規定嚴格，絕少有白𢭃人工嘅冗員。




星仔續約即變第3高薪




至於近季喺紅魔愈嚟愈重要嘅朴智星，據韓媒引述法國《足球雜誌》話，星仔今個月如果順利同紅魔續約2年，人工會跳到上424萬鎊（約5,420萬港元）至488萬鎊（約6,247萬港元）咁上下，超過艾拉成為曼聯第3高薪球員。




貴價貨艾迪巴約入冷宮




朴智星05年7月加盟曼聯嗰陣，年薪只係200萬鎊，09年續約2年已經加到340萬鎊，輾轉6年到咗今日續約就增長愈倍，證明喺費格遜眼內，佢已經唔係當初嘅賣衫生招牌，係個好使好用嘅球員啦！

反觀曼城近年買人個個都開高薪，點知買完艾迪巴約發現唔啱用踢落預備組。泰維斯收697萬鎊（約8,920萬港元）年薪，踢咗季好波就扭計想離隊，反而真係有料到嘅赫特，尋日續約5年都只係收緊520萬鎊年薪，喺球隊根本唔入流，都咪話唔洩氣呀！

曼城

排名 年薪（港元）

1.阿古路‧1.33億

2.耶耶托尼‧1.12億

3.艾迪巴約‧9,477萬

4.泰維斯‧8,920萬

5.迪斯高‧7,250萬

巴洛迪利

高路托尼

曼聯

排名 年薪（港元）

1.朗尼‧1.02億

2.里奧費迪南‧7,250萬

3.朴智星*‧6,247萬

4.艾拉‧5,440萬

5.貝碧托夫‧5,145萬

*如再續約2年