燕豪芬新兵醒捧上盤

猪拉多纳

07/08/2011
文： 牛奶仔

今晚荷甲頭場由上季3、4哥對決，今夏放走大量主力嘅阿爾克馬爾會喺主場出擊，迎戰班霸燕豪芬，料難打響頭炮，讓球盤客隊讓平半要上盤！（now639台周日晚上6:30直播）


AZ班主破產主力離隊


阿爾克馬爾雖然喺大前季打破3強壟斷局面取得荷甲冠軍，但隨住班主破產，佢哋近期喺轉會市場都有出冇入，今夏就有上季首席射手史基賀臣轉投阿積士，雲達維頓、赫達摩蘭奴同舒赫斯3名中場主力亦相繼離隊他投，即使簽入艾迪杜里同波文斯2名箭頭頂替，但2人暫時仍未融入隊波，加上阿爾克馬爾上周中先喺歐霸盃激戰完，今晚隨即要迎戰班霸燕豪芬，體力上完全輸蝕晒。




燕豪芬上季屈居喺阿積士同川迪之後得第3，今夏雖有翼鋒迪素迪沙基被撬走，但就由飛燕諾簽入番韋拿杜姆頂替，加上梅頓斯同史杜特文2名新兵亦表現對辦，令實力有增無減。況且燕豪芬喺近6次交手都未輸過，錄得3勝3和佳績，今次人腳同體力都贏晒，絕對捧得過。