洪禮賢講馬：當下力量與臨場

猪拉多纳

　　趁暑期空檔，剛剛又閱讀1本名為《The Power Of Now》嘅book，每次睇完，也有唔同嘅思維，但唔係那本book有咩「符弗」，都係白紙黑字，平裝印刷之嘛。但內裏的確係字字珠璣，有好多留白位，畀閱讀人士自己去想像，至於會諗咗去邊？莫講話人人唔同，就算同1人，隔得三兩日再睇，隨時亦有唔同程度差別。

　　The Power Of Now，即係「當下的力量」，放喺邊度都啱。實在閣下睇完呢個段落之前嗰3句，只消2秒時間，其實已成歷史，不可回撥時間，追唔番。之所以，捉緊現有一刻，係非常重要。硬係回首過去，或者預想一切，可能意義不大（唔反對念舊和儲蓄啊！），因為過去如煙，將來又太多變數，正如Eason名曲《擁抱這分鐘》，內容已着墨了不少。

　　講番賽事，如要捉緊當下，臨場嘅重要性好大，唔係話賽前準備冇參考性，如果真係冇，邊有咁多練馬師朝朝咁神心，舉鏡睇住啲馬操練，不如8點至現身，又唔係要喺烽火台打咭！之但係，好似賽駒、騎師、賽事模式等等，皆為臨場變數嘅齒輪，是但一瓣出現問題，結局會好唔同，正如當日巫斯義臨場脫水嗰期，嗰日坐騎點惡又如何，臨場邊敢買呀﹗？

馬會賽馬節目主持　洪禮賢