英荷大戰4場聯賽盃取消

猪拉多纳

10/08/2011


倫敦北部上周六爆發嚴重騷亂，多個地區都出現搶掠同縱火事件，當地警方為安全計，就同英格蘭足總展開緊急會談，繼昨晨宣布將4場聯賽盃延期之後，尋日足總亦宣布取消埋英格蘭對荷蘭場熱身賽！


加納對尼日利亞亦取消


暴亂上周六喺倫敦托特納姆爆發，大批滋事分子唔單止上街搗亂，仲搶掠商店、焚毀公共設施同警方搞對抗。立立亂成咁，所有位於倫敦嘅公眾活動都被迫取消，足球賽事當然唔例外，即使原定今晚喺溫布萊球場舉行嘅「英荷大戰」晨早已經賣咗7萬張波飛，但基於安全理由，足總尋日已經發聲明宣布取消比賽。




至於韋斯咸、水晶宮同查爾頓3間倫敦球會，亦聽從警方嘅建議，昨晨宣布將首圈聯賽盃賽事延期，3場受影響嘅賽事分別係水晶宮對卡維尼、查爾頓對雷丁、韋斯咸對艾迪索特。「錘仔幫」昨晨發表聲明話：「警力會集中去其他地方，為球員同球迷嘅安全着想，延期係最好嘅做法，但補賽日期就要同足總再傾。」




根據英國最新消息，暴亂喺全國都有蔓延迹象，所以布里斯托城對史雲頓場聯賽盃，以及喺倫敦屈福特舉行嘅加納對尼日利亞熱身賽都宣布取消，就連喺伯明翰備戰緊嘅英格蘭板球隊都被迫留喺當地酒店，並由警方重重包圍保護，唔准外出。