法國殘陣咬唔入智利

猪拉多纳

10/08/2011
文： 阿當K神

今晚國際熱身賽大戰連場，法國會喺主場迎戰由阿歷斯山齊士孭飛嘅智利，主隊有多名主力因傷缺陣，似樣嘅得番件賓施馬，實在難有勝算，寧捧1.95倍「讓球客勝」。（有線61及64、now714台周四凌晨3:00直播）




法國喺白蘭斯領軍後大有提升，已經連續9場不敗，但今次排陣肯定有排煩，皆因有大量常規正選正在養傷。除咗列貝利、麥薩斯、哥古夫同華布拿冇入選之外，里爾翼鋒皮耶又於日前因傷退隊，左閘艾拉於日前嘅英格蘭社區盾膝頭受創，同中場拿斯尼雙雙上陣成疑，白蘭斯亦表示唔會冒險派呢兩位英超兵出戰：「喺一場熱身賽派一啲未完全康復嘅球員上陣係非常不智。」




智利踢完美洲盃贏默契




另邊廂，智利今次大軍陣容同美洲國家盃時大致相同，阿歷斯山齊士同維達爾等主力都悉數入選，唯獨係射手漢拔圖蘇亞素缺陣，改由士砵亭前鋒迪亞高羅比奧頂替，相信呢名18歲天才定會藉呢個難得機會爭取表現，況且佢哋啱啱踢完美洲盃冇耐，狀態同默契都肯定好過法國，即使作客出戰亦有力全身而退。