洪禮賢講馬：超冷賽果冇本事中

猪拉多纳

　　翻看過去一堆賽馬派彩紀錄，可能自己冇本事，真係冇乜邊場有我份，熱嘅如是，爆到九彩嘅，更加唔會中到！

　　原來到目前為止，連贏位爆得最甘嗰場係99年3月7日「聖利」搭「春風得意」，Q派$18,872.5，嗰場係打吡大賽，最記得一代巨人愛倫，喺嗰場唔只出1隻馬，如果冇記錯，賽後佢接受訪問時，曾經講過「聖利」係冇乜人肯揀騎，結果帥印先會落在夏力信手中。

　　至於爆得最勁嘅獨贏及位置，係99倍「百勝福星」，呢匹馬當年隸屬岳敦，服役多季僅只贏過1場（插班即勝四班田草1400米），由梁明偉建功，結果「名留青史」，以$3,184.5獨贏及$523.5位置，暫時高踞首位。不過呢匹馬，贏完之後嗰兩季，跑得幾多，但攞得三兩場P就bye-bye。

　　唔睇真係唔記得，位置連贏最冷嗰場係喺05年10月，由三班馬「卓越之星」搭「盟友」構成，派彩高達$5,988.5。以上幾項紀錄，閣下如果記得吓已經算叻。

馬會賽馬節目主持　洪禮賢