布力般降呢預咗畀「狼」噬

猪拉多纳

13/08/2011
文： Wendy

新球季新氣象，日前我哋全體球彩台主持一齊拍宣傳片，仲安排我着住條紅噹噹靚裙添！今次公司都真係待我不薄喇，想睇點靚，當然要留意節目播映時段。我哋有線上季已經以高清播英超，今季再進一步，今晚6點起，一個全新24小時英超高清台（hd200）就會啟播。台號都有啲唔同，今季記得遙控係撳200至204（標清就撳300至305）。而hd200開鑼戰係利物浦對新特蘭，睇就好睇，但講到心水，我就推介布力般流浪對狼隊。（有線203及303台周六晚10時直播）




布力般同狼隊上季最後一輪英超，差啲攬住一齊降班，雖然最終護級成功，但今季可能冇咁好彩，尤其布力般愈踢愈縮，印度班主仲想放走主力減磅，賣走菲爾鍾斯後又冇新資金投入，搞到隊長基斯杜化森巴有離心，難為領隊堅恩仲好厚顏咁話幾年後可踢歐聯，唔該慳啲啦！


執靚防線作客頂得住


堅恩由登地聯收購前鋒葛維尼，頂替離隊嘅卡連歷，即係變相降呢，縱使今晚有主場之利，但因入座率向來偏低，搞到主場冇厘氣勢。反觀狼隊組班就相當有誠意，領隊麥卡菲由伯明翰收購後防大將羅渣莊臣，下半季護級功臣奧哈拉亦正式向熱刺買斷，加埋門將軒尼斯經常有神來之筆，條後防線已經執靚番晒。




另雖然話係季初，但同級球隊之間嘅勝負，分分鐘會成為季尾護級形勢嘅關鍵，所以狼隊絕對冇得留力，今晚受讓平半可取，我信狼隊至少贏半格。




Wendy推介：狼隊（下盤）