落泊三雄瞓醒未？

猪拉多纳

13/08/2011
文： 蘇斯黑柴

好多班霸勁旅都會患上季初病，德甲拜仁慕尼黑、法甲巴黎聖日耳門及英冠韋斯咸上周齊齊於聯賽揭幕戰主場輸波，傷盡球迷心，今周佢哋分途作客出擊，到底可唔可以一洗頹風挽回面子呢？


國王蓄銳 士氣大振 拜仁降堡志在必得


德甲班霸拜仁慕尼黑首戰遭遇滑鐵盧，主場輸畀上季差啲降班嘅慕遜加柏，今晚作客遇上宿敵馬加夫帶領嘅禾夫斯堡，肩負非勝不可嘅沉重壓力。不過今仗有「國王」列貝利蓄銳出擊，黑柴相信拜仁可以及時走出困境，推介1.68倍客勝。（有線61台周六晚9時30分直播）




拜仁嘅不利因素，係上仗賽後大部分球員都要為國家隊出戰，無法集中合練。不過黑柴相信拜仁多年來已習慣呢種情況，陣中德國國腳舒韋恩史迪加同卻奧斯周中贏巴西之役都有傑出表現，有助提升士氣同信心，該役拜仁多名戰將都有上陣，但由於主場出擊，唔使舟車勞頓，加上正值季初，球員體能恢復方面不成問題。




拜仁今仗最大利好消息係列貝利徹底傷愈，佢冇入選今期法國國家隊，今仗蓄銳出擊，有能力喺非勝不可嘅壓力下爆發，至於洛賓雖然因為荷蘭作客英格蘭一役改期得以提早返回慕尼黑備戰，但最後基於背傷未能披甲，佢嘅位置會由大勇嘅卻奧斯代替。


禾堡戰鬥力大倒退


禾夫斯堡上仗作客贈科隆3蛋，但過程絕不輕鬆，下半場科隆喺落後一球下大反撲，令禾堡飽食驚風散，若非科隆前線老大哥路華高域愚蠢被逐，禾堡未必穩勝。事實上目前禾堡實力遠遜大前季奪冠之時，攻擊線沙歷咸美斯、希美斯同文迪蘇傑，根本無法同當年嘅三叉戟米斯莫域、迪斯高同加菲迪相比，加上國腳中堅費特列治因傷缺陣，中場指揮官迪亞高遭教練馬加夫無限期禁賽，目前禾堡戰鬥力好一般，遇上志在必得嘅班霸拜仁唔夠砌。