英超開咧!!小兵喜鵲合演家變大龍鳳

猪拉多纳

13/08/2011
文： 力奇

英超開咧戰上演家變「大」龍鳳！今晚重頭戲紐卡素主場對阿仙奴，2支球隊今夏都受兵變影響，搞到陣容大變，今次狹路相逢，雙方都想贏波沖喜肯定搏錘，既然係咁，力奇決定博1.72倍入球大，等睇入球騷！（有線200、300及廣東體育周日凌晨0:30直播）




家陣可以話係雲格接掌阿仙奴15年以來最大嘅危機，2大主力法比加斯同拿斯尼走人，群龍無首，表現難免患得患失。


祖爾巴頓或有機會落場


睇番佢哋季前熱身賽，除咗首戰對馬來西亞明星隊冇失波外，之後5戰場場有失波，特別喺酋長盃2戰及作客賓菲加一役都係先入波嗰隊，然後畀人追和甚至輸波，球員明顯陷入信心危機，今仗點睇都唔似保得住清白身。




紐卡素領導層嘅決策仲過癮，佢哋為錢同為啖氣，先後放走隊長路蘭同荷西安歷基。即使賽前「喜鵲」領隊柏杜話，假如祖爾巴頓肯認衰，就會畀佢落場，不過力奇就唔敢寄望太大，始終班波仲有賓艾化同賴恩泰萊等傷兵，實力大幅削弱嘛！


上次對賽激開4:4


仲有呀，睇埋兩軍近6次交手，有5次開入球大，上次碰頭仲要係4:4，今仗博佢哋夾埋入到3球，唔過分吖！


紐卡素熱身賽唔掂


‧季前熱身賽5戰共錄得2勝1和2負。

‧上季開咧戰淨吞曼聯3蛋。

阿仙奴對賽旺開大

‧季前熱身賽6戰2勝3和1負，5場有失波。

‧近6次交手5場開入球大。