洪禮賢講馬：流於表面化的對錯

猪拉多纳

　　有時啲嘢流於表面化，唔覺有咩問題，深入了解後，係咪掌握到成盤棋，應該係（除非唔係）。有個好簡單嘅論點，未必人人啱聽，不過，可能係好多馬迷嘅經歷，睇落去就知有冇似曾相識感覺。

　　譬如賽期喺嚟緊禮拜三，上周四已經報咗名，撇開排位朝啲馬會退出嘅可能性，其實所有參賽馬喺晒報名表，大家一目了然。但由於未排位，騎師配搭未有、排檔未抽、配件會唔會更換未知，同時，有冇馬轉組亦唔清楚！

　　但有時只係揸住報名表刨馬，可能腦袋更清晰，事關上述幾項未知之數，最終幫唔幫到手，有時話唔埋？！至少例子有兩，首先賽駒未排位，我哋初步可能以較單一想法去評估，但一個唔好彩，鍾意嗰匹馬跑田草1200米，排位後抽到11檔（近兩季未贏過，上名率極低）， 點算好， 買定唔買？ 梗會十五十六，假如最後真係贏到，可能係昨日的我，打低今日的我。其二，排位後有埋配搭，死火嘞，韋達揀呢隻而唔揀自己心水嗰隻，又點算好，信佢定信自己 ？ 當然， 我哋有機會係諗多咗， 亦可能會係佢揀錯啦。