攞4冠王即退休車仔少帥大想頭

猪拉多纳

14/08/2011


【本報綜合報道】大部分城市人喺三十三歲之齡，仍然為事業而打拚，但亦有人喺呢個年紀考慮退休，所講嘅就係車路士領隊保亞斯。




呢位葡萄牙少帥於開鑼戰前表示，如果首季執教車路士就贏晒四大錦標包括聯賽、歐聯、足總盃及聯賽盃的話，佢將會向老闆阿布遞辭職信，提早退休，返老家同屋企人歎世界。




一季捧四盃對保亞斯唔陌生，因佢上季率領波圖一口氣擸晒葡超盃、葡超、葡盃及歐霸盃。不過英超水平比葡超高幾班，保亞斯要成功挑戰「四大滿貫」難過去火星，睇怕保亞斯呢個領隊仲有排撈。




其實世界上仲有好多領隊連一項冠軍贏唔到，若然保亞斯能夠濃縮喺一季之內搞掂晒，相信「寸王」莫連奴都要寫個「服」字畀佢徒弟！




同樣係新人類，活基治免轉會費加盟史篤城，仲話好開心終於唔使睇電視參與英超。


活基治投城盼轉運


由於傷患頻頻，近兩季活基治只曾為熱刺上陣三場聯賽，暑假終被放棄，估唔到史篤城竟然接貨，又睇吓活基治能否擺脫易傷命運。