保亞斯有料戰術多變 車仔破城

猪拉多纳

14/08/2011
文： 阿占

到底保亞斯有幾把炮？每年暑假都大手掃貨買球星嘅車路士，今夏最矚目變動，就係改由葡萄牙少帥保亞斯執教！阿占初步對呢位「新莫帥」就極有好感，今晚首度揸「車」出戰英超，作客踢法單調嘅史篤城，呢3分可以袋袋平安，1.62倍客勝玩得過。（有線200及300、廣東體育周日晚8:30直播）


費托腦震盪養傷


新季當然要講講陣容變動，車路士主要收購係比利時新星、被視為杜奧巴接班人嘅前鋒盧卡古，只係佢加盟冇耐，今場大多會列後備，相信一時三刻都好難挑戰「魔獸」正選地位。至於通天佬倌施哥夫離隊，佢本身影響力唔大，保亞斯可以話以上季原班陣容出征，默契絕冇問題。




正如之前所講，保亞斯上任係「藍戰士」最大改變，佢上季幫波圖贏取4冠王後人氣急升，接手車仔後亦令一班球員面上鑿住「信心」兩個字，季前熱身賽7戰全勝令人充滿憧憬！唯一擔心係「王子」費蘭度托利斯上周中踢太公波時受傷出現腦震盪，今仗肯定唔使預佢。


史篤城踢法單調


要送英超迎新禮物畀保亞斯，無邊隊好得過遇上英式足球代表史篤城。今季史篤城簽入厄遜同活基治兩名中堅，擺明想以守代攻，前面繼續靠手榴彈戰術同幾個高佬衝衝撞撞，但車仔向來唔怕呢種硬橋硬馬踢法，尤其以戰術多變見稱嘅保亞斯嚟講，賽前肯定做足功課，睇怕史篤城獨沽一味嘅踢法，要喺車路士身上偷雞都幾難！