舒賀爾尼孭飛 撐利華吐烏氣

猪拉多纳

14/08/2011
文： Yennie

上次講完蘇超，今日就同大家傾吓德甲啦！喺2010年世盃嗰陣，我深深被德國國家隊吸引，佢哋完全表露出日耳曼民族嘅特性：紀律好、重戰術、整體戰及夠機動！雖然英超同西甲係水平最高嘅聯賽，不過大部分德國球隊都係踢進攻足球，娛樂性分分鐘好過「英」「西」聯賽o架！今日我推介利華古遜主勝，希望繼上星期嘅些路迪之後，再一次幫到讀者啦！




雖則利華古遜今季先喺德國盃領先3球下畀乙組仔反勝，上周仲作客輸埋畀緬恩斯2球，而且睇埋往績，呢支德甲「利記」近10次對雲達不來梅只得1勝4和5負，不過我偏偏覺得佢哋今晚有能力贏番鋪！


不來梅狀態飄忽


點解？查實令我信心十足嘅，係因為利華今夏以800萬歐元從緬恩斯買入舒賀爾尼！依位90後哥仔喺周中代表德國，對巴西一戰除咗表現出色，仲入咗一粒，保持每兩場國際賽就入一球嘅紀錄，咁都未算威，舒賀爾尼上季喺德甲入嘅15球當中，佔半數係喺禁區外遠射，從數據去睇，佢絕對比5,000萬鎊身價嘅「費托」更物超所值呢！




更何況，就算睇番佢哋嘅對手不來梅，咪又係唔多掂，即使開咧戰贏波，但佢哋早排喺德國盃作客輸畀丙組仔，狀態咁飄忽邊靠得住，今晚大家一於睇住其貌不揚嘅舒賀爾尼，帶領「德甲利記」主場擊敗不來梅喇！


微博傳情


一到夏天，我就最鍾意玩水上活動，一得閒就會同三五知己去沙灘曬太陽、遊船河、滑水、玩水上電單車等等！上星期我同大班好友出海，今次遊船河嘅主題係「老友鬼鬼之面具船河派對」，每個朋友都戴住唔同公仔嘅面具出席，有阿凡達、大黃蜂、蝙蝠俠等等，我都唔輸蝕，喺西貢上船前買番個豬仔面具湊熱鬧呢！