富豪曼城恰窮鬼 史雲斯開咧戰5連敗

猪拉多纳

15/08/2011
文： 力奇

周二凌晨英超獨腳戲上演富豪對窮鬼！財雄勢大嘅曼城今夏積極增兵爭冠軍，今晚佢哋喺主場迎戰全英超班費最少兼係史上首支出戰英超嘅威爾斯球會史雲斯，大家卡士有別邊有得砌。最緊要史雲斯例牌出閘腳軟，已經連續5季開咧戰輸波，今場一於博曼城大炒，要1.63倍「讓球主勝」！（有線200、300及廣東體育周二凌晨3:00直播）


買人使費係史雲斯6倍


曼城今夏買人總共使咗成6,270萬鎊（約8億港元），其中單係一個阿古路就用咗3,960萬鎊，而且仲未計拿斯尼添，反觀史雲斯總支出僅1,000萬鎊（約1.27億港元）左右，最貴嘅丹尼格拉咸只係值350萬鎊，真係連阿古路嘅零頭都唔夠，要兩班使費差6倍嘅波同場較量，真係搵着史雲斯嚟搞。


首支威爾斯球隊戰英超


冇錯，曼城個新兵「標王」阿古路今仗只會踢後備，舊將泰維斯未操起狀態都唔會落場，但佢哋前線仲有巴洛迪利拍住迪斯高，上仗社區盾佢哋對住曼聯都可以有2個入波，唔通會撕唔開史雲斯條英冠級數防線咩？仲有一點，曼城個主場威力好勁，近10場主場聯賽取得9勝1和，史雲斯憑乜嚟爆冷先？




27年來首度重返頂級聯賽嘅史雲斯，亦係歷來首支威爾斯球隊出戰英超，聽落幾巴閉，但最怕係下季就做番升降機。咪話力奇黑心，呢班波上季都只係靠附加賽升班，今夏人腳變動又唔少，雖然話買入咗英冠神射手丹尼格拉咸，不過呢位上季喺聯賽射入23球嘅27歲前鋒，進步空間始終唔會太大，依家嚟到英超隨時現形。




況且，上季表現神勇嘅門將迪維里斯新季又過檔狼隊，領隊羅渣士只係由烏德勒支搵嚟禾姆頂檔，有隱憂o架！佢哋今仗仲會有前鋒列達、魯迪治同守將哥爾卡等新兵進行聯賽首演，默契有待培養，後防重臣兼隊長蒙克更加因為腳傷缺陣，以佢哋連續5季開咧戰輸波呢個現時英格蘭4級聯賽最羞家紀錄，今仗點捧得落手？


曼城赫特一夫當關


‧連聯賽及盃賽計算，經已連續17戰未嘗和波。

‧門將赫特上季聯賽18場不失，係全英超最佳。

史雲斯上季客勝率唔夠4成

‧對上一次喺頂級聯賽交手係82至83球季，當年各自喺主場贏波。

‧上季英冠作客勝率39%。