川迪出齊架生獵鷹

猪拉多纳

16/08/2011
文： 朱楓

有乜比返屋企更好？荷甲勁旅川迪今晚喺歐聯附加賽首回合對「里斯本之鷹」賓菲加，終於獲准重返主場比賽，大大提升信心同士氣，加上殺手拜仁雷斯已獲「解凍」，對住人腳唔齊嘅賓菲加，小讓平半朱楓梗係撐上盤啦！（有線64及204周三凌晨2:45直播）




川迪近年喺荷甲表現神勇，上季又取得亞軍，今季得以進身歐聯。雖然今年改由阿祖安斯執教，但表現亦冇走樣，上圈歐聯兩回合計以2:0輕取華斯路伊，喺荷超盃又作客擊敗阿積士捧盃，暫時喺荷甲更加兩連勝，表現極之對辦。


賓菲加新兵舊將未磨合


川迪主場早前因為擴建倒塌死人，被罰臨時封閉，好彩執正咗之後，獲准解封舉行荷甲賽事，日前更獲歐洲足協批准，可以用嚟舉行今晚對賓菲加嘅歐聯，肯定有助球員發揮；至於早前因被熱刺挖角想走而被球會雪藏嘅射手拜仁雷斯，日前亦同川迪傾掂數，喺對阿爾克馬爾後備上陣仲即刻入波，難怪賽後畀教練阿祖安斯激讚，話荷甲冇第二個球員實力拍得住呢位哥斯達黎加國腳，仲話好有信心解決賓菲加，事關佢曾經教過波圖，非常熟悉賓菲加踢法咁話。




由於上季只得葡超亞軍、今夏大事增兵嘅賓菲加，雖然早前喺歐聯第3圈外圍賽兩回合以3:1輕取特拉布宗晉級，但喺葡超揭幕戰作客卻喺領先兩球下，最後被基維辛迪逼和2:2，反映新舊球員仲處於磨合期，當中新簽嘅西班牙國腳左閘卡迪維拿，仲因狀態不足，被踢出歐聯大軍，加上射手奧斯卡卡度素又扭計離隊避戰，相信今晚都只望輸少啲，博次回合返主場先砌過！