129億西超盃決戰 撐巴塞稱皇

猪拉多纳

17/08/2011
文： 力奇

連法比加斯都加盟埋巴塞，今晚場西超盃次回合大戰，將會變成史上最貴、總值11.55億歐元（約129億港元）嘅對決！巴塞首回合半力出擊兼作客都可以踢成2:2，今晚返到嚟魯營主場兼有法比仔首演，要贏波捧盃有幾難？我捧1.67倍主勝！（now632及660台周四清晨5:00直播）




皇馬一隊大軍26人總身價達到5.48億歐元（約61.4億港元），巴塞嘅23人則值6.07億歐元（約67.6億港元），兩隊波星光熠熠，真係捱眼瞓凌晨5點起身睇波都值。講番場波，力奇首先要認衰，西超盃首回合睇好狀態大勇嘅皇馬砌得低巴塞，結果驚濤駭浪之下銀河艦隊先逼和2:2。


碧基沙維復任正選


老實講，首回合皇馬其實踢得好出色，全場緊逼踢法睇到班人好Fit，前線賓施馬亦都係進步良多，可惜嘅係佢哋遇到「地上最強」嘅巴塞，收起沙維、布斯基斯、碧基同柏度洛迪古斯等正選，派出新季未嘗踢過正式比賽嘅美斯同阿歷斯山齊士，結果都一度超前2:1，就算最後只係和波收場，相信主帥哥迪奧拿都一樣收貨。




賽後唔少皇馬球員都講話贏唔到係冇運，不過力奇認為兩班波嘅把握力同默契，先係高低嘅分野。事實上，美斯同韋拿全場波機會唔多，但一、兩次射門就可以轉化成入球。再者，巴塞嘅踢法相當成熟，畀波走位現身，對於意識良好嘅新兵A山絕對冇問題，更何況係自細喺拉瑪西亞青訓營長大嘅法比仔呢？




首回合皇馬就算有主場之利，兼夾控球指數較多，一樣奈巴塞唔何，今次嚟到次回合巴塞主場，預計至少碧基同沙維都有望復任正選，法比仔至少會後備披甲，巴塞絕對有把握喺自己地頭捧盃打響頭炮囉！




賽制採主客兩回合，今輪為次回合，若兩回合總比數賽和，以作客入球較多一方為勝，若作客入球數字相同，則在次回合後加時30分鐘，再和則互射12碼分勝負。