競賽會葛度爾古斯大廝殺

猪拉多纳

17/08/2011
文： 九叔

一支球隊有信心係唔夠嘅，仲要有本錢至得，自認係爭標勁旅嘅葛度爾古斯，今日响阿甲作客對競賽會，因為冇咗件10號仔馬里安奴當達，想贏唔係咁易，都係博2.05倍入球大算嘞。（廣東體育周四早上8:15直播）




葛度爾古斯隊波真係唔太差，上季能夠第6名衝線，就知佢哋有番咁上下斤両，而且喺對賽數據方面，佢哋自09年11月起5次主客場對競賽會不敗，攞到3勝2和，更加佔晒上風。但係打波嘅嘢冇話一本通書可以睇到老，今場波因為個10號仔馬里安奴當達，跟咗馬納當拿去咗阿聯酋掘金，葛度爾古斯要搵件啱啱加盟嘅厄瓜多爾兵富蘭克林沙拉斯領軍，呢件中場波係好呀，弊在未適應環境融入隊波呢，連自認帶緊隊爭標強隊嘅教練佐治達施華都認，依家最頭痛就係呢瓣，何況今場佢哋仲有個中場尼高拉斯山齊士停賽添。


競賽會隊長復出有權駁火


競賽會都唔係冇問題，呢隊由施蒙尼帶嘅波，似乎仲未夾得好好，開鑼戰主場1:1打和堤格雷場波，踢右邊嘅前鋒加比侯治愈墮愈後，有成半粒鐘好似喺度打右中場或者右後衞咁，好多人都質疑施蒙尼戰術有問題。不過經過一場磨合，競賽會响練波嘅表現已經有改善，加埋隊長耶高比又復出，夠晒條件同葛度爾古斯對攻，今場波就算W唔出都會踢得好燦爛，梗係博好分過主勝嘅入球大啦。