飛腳鯨魚大騷咪嫌熱

猪拉多纳

17/08/2011
文： 走肖

大阪飛腳今晚喺日職主場迎戰名古屋鯨魚，勢必上演入球「大」騷！兩隊近排入波停不了，賽前飛腳教練西野朗更加話，今場會安排19歲秘密武器大森晃太郎上陣，加強火力展開對攻，既然鯨魚中前場「全員順調」（所有球員狀態好），梗係要熱捧1.46倍入球大啦！（now633台周三晚6:00直播）




現時飛腳只係落後榜首嘅鯨魚2分，即係話，呢場贏到就可以反壓對方，由於武井澤也同橋本英郎分別要停賽同養傷，消息話西野朗打算派宇佐美貴史同期受訓優質產品大森晃太郎，職業生涯首次打正選，希望飛腳嘅進攻模式有新變化。


雙方失球數列日職三甲


睇吓啲數據，自93年日職成立起，飛腳係J1史上失波最多球隊，失球數字高達999球，但同時間，佢哋有1,119球進帳，入波始終比失波多，而且鯨魚失球數字係903球排第3位，同樣唔穩陣，所以飛腳司令塔遠藤保仁賽前話，有信心用進攻足球打沉對手。




事實上，飛腳今季未試過喺聯賽冇波入，20戰喪入47球，近6次對賽又全部開入球大，對住有門將楢崎正剛養傷嘅鯨魚，點都唔似冇波入。再講，鯨魚前鋒約舒亞堅尼地、玉田圭司、永井謙佑同中場小川佳統全部着晒火，帶挈球隊7連勝，丹尼臣哥度巴又好番，呢場邊似悶波？