撐保亞斯捧車路士

猪拉多纳

20/08/2011
文： 車車

各位讀者，今年我車車有好多新嘗試，除咗「跳出收音機」喺球彩台同大家一齊睇波外，亦加入「球彩全女打」成為「名家」，各位多多指教！




今晚我會(目及)住尾場車路士對西布朗。（有線200及300台周日凌晨零時30分直播）我對有「莫連奴二世」之稱嘅領隊保亞斯有信心，一來佢執教車路士以來都未試過輸波，不過唔知佢仲敢唔敢再用費蘭度托利斯？呢個西班牙金童唔多夾「車仔」就全世界都知，上星期作客史篤城就係因為佢浪費幾個入球機會，搞到球隊出師不利。計埋佢喺利物浦嘅時間，都差唔多年半無踢過場好波，希望今晚西布朗畀佢入番幾球提升信心啦。


吼「讓球主勝」加大


西布朗上場不敵曼聯，都算正常吖，班「紅魔鬼」未開「咧」前已經踢到着晒火，擺明車馬就係要蟬聯英超，西布朗可以捱到半場都算叻仔o架喇，今場西布朗要作客倫敦對車路士，「車仔」應該唔會贏一兩粒咁簡單。




睇往績，近五次英超對賽，車路士係一面倒贏晒西布朗，加上以保亞斯進攻型嘅排陣方式，呢場可以博「讓球主勝」同入球大添。