曼城執到保

猪拉多纳

21/08/2011
文： 樂比堅尼

今晚英超大曼徹斯特打吡，曼城兩名阿根廷貴價外援，身價共值6,300萬鎊嘅泰維斯及阿古路有機會同時登場鬥保頓，阿古路上仗對史雲斯後備入替連入兩粒，表現驚為天人，今次正選上陣，肯定反轉保頓嘅銳步球場，樂比仔捧客勝！（有線200及300台周日晚11時直播）




曼城開鑼戰對史雲斯，上半場一度陷於苦戰，但下半場換入阿古路即刻完全唔同晒，可見呢位細個曾窮到冇飯開，幾乎要食樹皮嘅球星甚有級數，身價絕對值得上3,800萬鎊！領隊文仙尼賽前亦獲得另一好消息，泰維斯傷勢無礙已復操，兩位阿根廷國腳有機會故劍重逢。


保頓「打吡戰」失魂


保頓開鑼戰雖然大勝升班馬昆士柏流浪四比○，但只係對手後防唔集中，保頓表現唔算特別好。事實上，保頓今季人腳冇乜補充，新加盟嘅李奧曲卡屬工兵型球員，土耳其國腳端基又未必出得，暫時難以彌補艾文達離隊同李青龍養傷嘅空缺。




另外，保頓喺大曼徹斯特打吡嘅成績亦唔算好（大曼徹斯特打吡包括曼聯、曼城、保頓及韋根四隊），近兩季八次聯賽對曼聯、曼城未贏過，僅得二和六負成績，當中有五場冇波入，即使對住實力較弱嘅韋根，上季兩場都係打和，換句話講，保頓喺上季六仗大曼徹斯特打吡一場都冇贏過，相反曼城近期氣勢咁勁，睇怕保頓今場都好難打破宿命！