哈化撇甩fans就醒神

猪拉多纳

21/08/2011
文： 蘇斯黑柴

黑柴見到好多投X者，輸完波好興鬧啲球隊演出時好時壞難以捉摸，但其實只要花啲心機尋找佢哋反覆原因，對球隊特性有更深入掌握，就會搵到更多投X契機。




今晚德甲漢諾威主場對哈化柏林（有線61及201台周日晚11時30分直播），哈化今季重返德甲，首仗主場負紐倫堡踢得極曳，不過跟住作客賽和漢堡就全場佔盡優勢，主弱客強皆因一向同自己嘅首都球迷唔齊心，哈化球迷既麻煩又要求高，比賽中慣性手指拗出唔拗入，球員踢得差少少即被己方球迷噓，完場後隊巴經常被圍攻，所以佢哋根本唔鍾意踢主場，反而作客壓力減輕醒得多。唔講大家唔知，哈化近17場德甲主場賽事未贏過，上次贏波已經係超過兩年之前嘅事，所贏嘅咁蹺就係今仗對手漢諾威，相反近9場德甲作客賽事4勝3和僅輸2場。


漢諾威分心歐霸盃


相反對手漢諾威正忙於「為國捐軀」，雖然佢哋今季開咧後聯賽連盃賽4戰全勝，不過正分心歐霸盃，三日前附加賽首回合主場贏西維爾2:1，但四日後作客西班牙嘅次回合相當難踢，德甲球隊今屆歐霸成績曳，緬恩斯外圍賽已出局，史浩克附加賽首回合亦輸緊0:2，漢諾威成為最有機會打入分組賽球隊，為保德甲歐洲排名點都要盡搏，球隊兵源有限，今晚好難集中精神搏殺，推介哈化「讓球客勝」同客Ｗ。