東京綠茵型佬助陣

猪拉多纳

21/08/2011
文： 蘇豪

家有一老，如有一寶，若然有兩老又點呢？FC橫濱本來擁有日本陳年國寶三浦知良，近期再引入前巴西國腳法蘭卡，兩位沙場老將經驗豐富，但加埋接近八十歲，年事已高，即使有心搏殺，恐怕亦走唔郁，預計會以戥腳形式落場。FC橫濱今次撮合兩大名將，相信只屬噱頭，志在吸引更多球迷入場，實際作用有限。




最近亦有一位星級名將登陸日乙，前日本國家隊型佬中鋒卷誠一郎強勢加盟東京綠茵，此子之前於千葉市原踢得好哋哋，於國家隊偶然都有得落場。不過，卷誠一郎兩年前學人出國搵食，可惜於俄國撈唔掂，跟手降呢轉赴中國加入深圳紅鑽搵人仔，發展同樣麻麻，最終決定重返祖家落班。卷誠一郎今次去到東京綠茵，將會全力協助球隊爭取升班，大軍本周主場對鳥棲砂岩，小讓平半可秤先。